Еден од лидерите на ВЛЕН и Министер за здравство во Владата на Република Северна Македонија, Арбен Таравари, преку Фејсбук објава предупреди дека геополитичките тензии во Европа и промените во надворешната политика на САД би можеле да имаат сериозни последици за Балканот, посочувајќи дека Косово може да стане точка на пресврт за поголем конфликт доколку меѓународната заедница не постапи внимателно, пренесува Инбокс7.
„Доколку се донесе неправедна одлука, дури и за еден мал дел од неа, Косово ќе влезе во историјата како мала држава што го запали големиот конфликт – и сите ние ќе бидеме дел од конфликтот кој, можеби, ќе се нарече Трета светска војна,“ изјави Таравари.
Тој додаде дека дипломатијата, која ја нарече „уметност во изумирање“, е клучот за избегнување на ескалација во регионот. Според него, американско-европските односи минуваат низ период на нестабилност што ги засега и Балканските држави, особено Северна Македонија.
„Балканот отсекогаш бил буре барут кое, ако се запали, нема да го зафати само овој континент, туку целиот свет. Косово е само еден пример каде што глобалните несогласувања може да се прелеат,“ нагласи Таравари.
Според него, регионот мора да покаже зрелост и подготвеност за дијалог, додека меѓународните актери треба да се воздржат од одлуки кои би можеле да го поткопаат кревкиот мир. „Само преку дипломатија и соработка можеме да ја избегнеме катастрофата што демне на хоризонтот,“ рече тој.