Јавното претпријатие за одржување и заштита на магистрални и регионални патишта – Скопје веќе 12 години функционира со блокирана банкарска сметка, што сериозно го загрозува одржувањето на патиштата низ земјата, предупредува Државниот завод за ревизија (ДЗР) во својот најнов извештај.
Во 2022 година, обврските на претпријатието по извршни решенија изнесувале 467 милиони денари, но според официјалните податоци од банките, вистинскиот долг изнесувал 663 милиони денари (приближно 10,7 милиони евра). Оваа разлика од 195 милиони денари, според ревизорите, укажува на сериозни недостатоци во финансиското управување.
Претпријатието, кое во тој период било под раководство на генералниот директор Костадин Ацевски, продолжува да работи во услови на финансиска неизвесност. Сметката е блокирана, а активностите се реализираат само преку месечни лимити, утврдени со судска одлука. Во 2021 година, судот дозволил месечно располагање со 231 милион денари, што е доволно само за основни оперативни трошоци.
Последици врз одржувањето на патиштата
Поради финансиската блокада, претпријатието се соочува со сериозни проблеми во набавката на материјали, како сол за зимско одржување и гориво за механизацијата. Ревизорите откриле дека горивото се мери со неверификувани мерни летви, што отвора простор за злоупотреби и нерегуларности.
Дополнително, дел од набавените резервни делови, проценети на 53 милиони денари, стојат неискористени со години, а расходуваната механизација и возила во вредност од 215 милиони денари не се соодветно отуѓени или искористени за резервни делови.
Неправилности во исплатата на плати
Извештајот посочува дека, и покрај финансиските проблеми, во 2022 година се исплатени 33,5 милиони денари повеќе за плати, иако бројот на вработени е намален. Ова, според ревизорите, е резултат на зголемување на вредноста на бодовите за пресметка на плати без владина согласност.
Дополнително, во персоналните досиеја на дел од вработените недостасуваат основни документи, а некои од нив се распоредени на работни места без соодветно образование.
Осигурување без покритие
Еден од најзагрижувачките наоди е дека, иако претпријатието управува со имот вреден 2,1 милијарда денари, тој не е осигурен од пожар или природни катастрофи. Ова, според ДЗР, претставува дополнителен ризик по работењето на претпријатието.
ДЗР препорачува Владата и надлежните институции да преземат итни мерки за финансиска стабилизација, ослободување на сметката од блокади и подобрување на транспарентноста во работењето.
Претпријатието досега не дало официјален одговор за извештајот, но останува неизвесно како ќе се решат наталожените долгови и дали патиштата ќе можат да се одржуваат без ризик од целосен финансиски колапс. / Инбокс7