Северна Македонија останува посветена на развојот на добрососедските односи, но билатералните спорови со Бугарија продолжуваат да го оптоваруваат процесот на европска интеграција, изјави министерот за надворешни работи Тимчо Муцунски по средбата со неговиот бугарски колега Георг Георгиев на Минхенската безбедносна конференција.
„Наместо напредок во добрососедската политика, односите меѓу двете земји остануваат оптоварени со билатерални разлики, кои претставуваат непринципиелна пречка на нашиот европски пат“, рече Муцунски.
Тој нагласи дека сите отворени прашања треба да се решаваат преку дијалог, взаемна почит и разбирање, додавајќи дека добрососедството подразбира и поддршка за европските интеграции на Северна Македонија како стратешка цел.
Муцунски изрази загриженост за положбата на македонското малцинство во Бугарија и ја нагласи потребата од спроведување на одлуките на Европскиот суд за човекови права (ЕСЧП).