Лидерите на коалицијата ВЛЕН вечерва ќе присуствуваат на ифтарска вечера организирана од премиерот на Косово, Албин Курти, потврди Арбен Таравари, пренесува ТВ21.
Таравари изјави дека на средбата ќе се разговара и за политички теми, но негираше дека ќе се дискутира за тоа кој ќе биде лидер на ВЛЕН.
„Вечерва сите сме поканети од господинот Албин Курти, премиерот на Косово, на ифтар. Верувам дека ќе дискутираме и за политички теми, но воопшто не сме разговарале за тоа кој е лидер на ВЛЕН. Доколку ми се понуди таква можност, дали би ја прифатил? Воопшто не сум размислувал за тоа, ниту ме интересира“, изјави Таравари.
Иако лидерот на Движењето Беса, Билал Касами, вчера изјави дека не е можно на локалните избори да има посебни кандидати и одвоени листи за советници, Таравари нагласи дека разговорите за изборната стратегија во рамките на коалицијата продолжуваат.
„Во тек се преговори. Атмосферата во коалицијата е релаксирана, верувам дека ќе најдеме заеднички јазик и ќе ги решиме сите недоразбирања“, додаде Таравари.
Според извори на ТВ21, на вечерата кај Курти, покрај Таравари, ќе присуствуваат и Изет Меџити, Билал Касами, Зеќирија Ибраими, Беким Ќоку и Фатмир Лимани. Сѐ уште не е потврдено дали ќе присуствува и претседателот на Собранието, Африм Гаши.
Изворите сугерираат дека на средбата е можно да се разговара за зајакнување на соработката меѓу лидерите на ВЛЕН, односно за создавање на „ВЛЕН 2.0“, пообединета структура, со Таравари како потенцијален претседател.