Македонскиот пенитенцијарен систем се соочува со сериозни недостатоци, меѓу кои пренатрупаност, лоши материјални услови, недоволен број кадар и нехигиена, покажува најновиот извештај на Државниот завод за ревизија.
Според ревизорите, условите во затворите не ги исполнуваат меѓународните стандарди за хуман третман, а несоодветното управување и недостигот на активности за ресоцијализација дополнително го влошуваат системот.
Извештајот, кој го опфаќа периодот 2021–2023 година, открива дека затворите во Идризово, Скопје, Куманово и Штип се најтешко погодени. Во некои ќелии со површина од 14 м2 се сместуваат и по осум осудени лица. Во КПД Идризово, ревизорите забележале нефункционални санитарии, влага, валкани душеци и непријатен мирис.
Во Затвор Скопје, ревизорот наведува дека хигиената во одделите за притвор е под секое ниво. Затворот во Куманово, пак, се соочува со недостиг на вода, што дополнително ја отежнува хигиената. Во повеќе установи, осудените користат по една чешма на кат.
И покрај донесувањето на Законот за амнестија во 2023 година и развојот на пробациската служба, затворската популација расте. На крајот на 2023 година, бројот на затвореници изнесувал 2.265, што е 140 лица на 100 илјади жители – меѓу највисоките стапки во Европа.
Капацитетите се надминати во седум од вкупно единаесет установи. Највисока пренатрупаност е забележана во КПД Штип, каде бројот на затвореници го надминува капацитетот за 89 лица.
Дополнително, затворската полиција работи со недоволен број кадар – во Идризово, еден припадник на обезбедувањето е задолжен за над 50 затвореници во одредени смени. Недостига и соодветна безбедносна опрема и системи за видео надзор.
Ревизијата нотира и зголемени трошоци поради прекувремена работа, како и финансиски обврски по основ на судски пресуди за неисплатени надоместоци.
Извештајот е уште една потврда на долготрајните критики од Европската комисија за состојбите во затворите, кои се наведени и во Извештајот за напредок на Северна Македонија за 2024 година.