Палестински официјален претставник изјави во понеделникот дека Хамас го прифатил предлогот за прекин на огнот во Газа, посредуван од американскиот пратеник Стив Виткоф, но израелски функционер остро го отфрли тврдењето, нагласувајќи дека не станува збор за американски предлог и дека ниту една одговорна израелска влада не би го прифатила.
И самиот Виткоф демантираше дека Хамас ја прифатил неговата понуда за договор за ослободување на заложници и прекин на огнот, изјавувајќи за Ројтерс дека предлогот кој се дискутира е „целосно неприфатлив“ и не е неговата верзија на договорот.
Палестинскиот извор близок до Хамас за Ројтерс изјави дека предлогот, доставен преку посредници, предвидува ослободување на 10 живи израелски заложници во две групи, 70-дневен прекин на огнот и делумно повлекување на израелските трупи од Газа.
„Предлогот вклучува ослободување на 10 живи израелски заложници од страна на Хамас во две фази, во замена за 70-дневен прекин на огнот и делумно повлекување од Појасот Газа,“ изјави изворот. Предлогот исто така содржи ослободување на голем број палестински затвореници, вклучувајќи стотици кои издржуваат долги казни.
Израелски официјален претставник го отфрли предлогот, нарекувајќи го неприфатлив за каква било одговорна влада и негирајќи дека се совпаѓа со понудата на Виткоф.
Премиерот на Израел, Бенјамин Нетанјаху, во видео порака на социјалните мрежи изјави дека „многу се надева“ оти ќе има напредок во врска со борбата против Хамас и ослободувањето на заложниците, „денеска, а ако не денеска – тогаш утре“.
Неговата канцеларија не даде веднаш коментар во врска со видеото.
На 18 март, Израел официјално го прекина јануарскиот договор за прекин на огнот со Хамас и ја продолжи својата воена кампања во Газа. Два дена подоцна, Хамас и сојузничките групи повторно започнаа со ракетирање и напади.
Хамас изјави дека е подготвен да ги ослободи сите останати заложници кои беа киднапирани во нападите на југот на Израел на 7 октомври 2023 година и да прифати траен прекин на огнот доколку Израел се повлече целосно од Газа.
Нетанјаху, пак, нагласува дека Израел би прифатил само привремен прекин на огнот во замена за ослободување на заложниците, и дека војната ќе продолжи додека Хамас не биде уништен.
Израел ја започна офанзивата по нападите на Хамас, во кои според израелските податоци беа убиени 1.200 лица, а 251 беа киднапирани и однесени во Газа. Според здравствените власти во Газа, досега во конфликтот загинале речиси 54.000 Палестинци, а регионот е целосно опустошен. Хуманитарните организации предупредуваат на широка појава на тешка неухранетост.