Владата на Грција планира да предложи укинување на уставната гаранција за трајно вработување во јавниот сектор, изјави премиерот Киријакос Мицотакис, најавувајќи значајна реформа што ќе се разгледува во рамки на претстојната уставна ревизија кон крајот на годината, пренесува Инбокс7.
Во интервју за радио, Мицотакис рече дека владејачката Нова демократија ќе предложи измена на член 103 од Уставот, кој во моментов ја гарантира трајноста на работните места за државните службеници. На прашањето дали оваа промена ќе важи и за сегашните вработени и за идните, тој одговори: „За сите“.
„Го надминавме времето кога државните службеници се чувствуваа загрозени од промена на власта“, рече Мицотакис. „Трајноста не смее да создава инертност, особено кога постојат очигледни слабости во системот.“
Предлогот е дел од поширокиот план на владата за реформирање на јавниот сектор, што вклучува задолжителни проценки на ефективноста и воведување бонуси за успешни вработени.
„Не е замисливо државен службеник да одбие евалуација,“ рече премиерот. „Ќе има последици. Евалуацијата не е опционална – таа е основа на секоја ефикасна администрација.“
Владата тврди дека системот за евалуација е зајакнат и потранспарентен, со алатки за откривање нејасни или недоволно прецизни оценки.
Широка поддршка за реформите
Јавноста, според анкетите, покажува силна поддршка за овие мерки. Истражување на агенцијата Марк, објавено во весникот Прото Тема, покажува дека 88% од испитаниците поддржуваат евалуација на државните службеници, а 76,2% се согласуваат со укинување на трајното вработување за неефикасните работници.
Уставната ревизија ќе опфати и други прашања, вклучително и легализација на приватни универзитети, заштита на животната средина, одговорност на министри и гласање по пошта. Мицотакис претходно најави и можност за воведување на еден шестгодишен мандат за претседателот на државата.
Повик за консензус
По средбата со претседателот на Парламентот, Константинос Тасулас, минатата недела, Мицотакис повика на поширок политички договор околу уставните измени.
„Уставните ревизии треба да градат мостови, а не да создаваат нови поделби,“ рече тој. „Такво нешто бара и самиот Устав, и се надевам дека партиите ќе пристапат кон дебатата со институционална одговорност.“
За уставна измена да се донесе, потребни се најмалку 180 гласови во актуелниот состав на Парламентот, за таа да може да се потврди со просто мнозинство од 151 пратеник во следниот. Ако измената биде усвоена со 151 до 179 гласа во сегашниот состав, тогаш за нејзино финално усвојување се потребни 180 гласа во следниот парламент.