Извештајот за напредокот на Северна Македонија се очекува да биде усвоен на пленарната седница на Европскиот парламент во иста содржина како што беше изгласан во Комитетот за надворешни работи, оценува политичкиот аналитичар Џелал Незири.
Во изјава за TVM2, Незири вели дека извештајот во оваа фаза има аналитичка природа – идентификува локални предизвици и истовремено препорачува исполнување на условите што се очекуваат од една земја-кандидат за членство во Европската Унија.
„Употребата на термините ‘македонски идентитет’ и ‘македонски јазик’ во извештајот не е поврзана со одлука на Европскиот совет, туку е дел од еден аналитички документ кој, според мене, нема да претставува проблем ниту за земјите кои имаат приговори. Пратениците немаат право на вето во оваа фаза“, изјави Незири.
Според него, извештајот со иста содржина ќе помине и во Европската комисија, додека евентуални блокади може да се појават во завршната фаза во Европскиот совет, каде што одлуките се носат со консензус од страна на лидерите на 27-те земји членки.
„Кога ќе дојде време за носење одлуки врз основа на овој извештај – како што е отворање на преговарачки поглавја – одлуките ќе ги носи Советот, каде Бугарија има право на вето. Очекувам извештајот да помине без измени, како што беше предложен од известувачот Томас Вајц, и да претставува поттик за официјално Скопје да ги исполни обврските“, додаде Незири.
Во меѓувреме, Софија информираше европски институции дека нема да изнесе нови барања кон Скопје, но инсистира на почитување на условите кои веќе се дел од преговарачката рамка – вклучувајќи го внесувањето на Бугарите во Уставот на Северна Македонија.
Институциите на ЕУ остануваат фокусирани на продолжување на процесот на евроинтеграција според компромисот постигнат во 2022 година. Уставните измени, кои бараат двотретинско мнозинство во Собранието, остануваат клучен услов за формален почеток на пристапните преговори.