Министерството за надворешни работи на Бугарија остро ја осуди изјавата на премиерот на Северна Македонија, Христијан Мицкоски, оценувајќи дека неговите коментари се некомпатибилни со основните норми на дипломатскиот и политичкиот дијалог, како и со принципите на добрососедство.
Реакцијата следува по изјавата на Мицкоски дадена во средата, кога тој, одговарајќи на квалификацијата „северномакедонски премиер“ употребена од бугарскиот министер Георг Георгиев, изјави дека „му дале задача да се задева, исто како глушецот со лавот“.
„Па, не би го коментирал тоа момче. Тоа е влада којашто друг ја раководи во заднина. Му рекле ‘ајде сега задевај се’, тоа е исто како кога глушецот го задева лавот“, изјави Мицкоски.
Бугарското МНР соопшти дека повторната употреба на вулгарни квалификации кон бугарски државни претставници го поткопува веќе кревкиот билатерален дијалог и ја доведува во прашање искрената заложба на Скопје за спроведување на Договорот за добрососедство од 2017 година.
„Овој неприфатлив и навредлив јазик не соодветствува на политичка зрелост и не ја демонстрира посветеноста кон европските вредности и процесот на пристапување во ЕУ, кој бара заемно почитување и одговорност“, се наведува во соопштението на бугарската дипломатија.
Георг Георгиев претходно изјави дека „успеале да спречат Европскиот парламент да биде искористен за домашна политичка пропаганда на Мицкоски“.