Европската комисија ја одобри повеќегодишната буџетска рамка на Германија, со која ѝ се дозволува привремено зголемување на јавната потрошувачка, додека постепено се враќа на фискална дисциплина до 2029 година, соопшти висок германски функционер.
Станува збор за т.н. Фискално-структурен план (FSP) што Германија го достави до Комисијата во рамките на новите правила на ЕУ за стабилност и раст. Планот предвидува раст на нето јавната потрошувачка во првите години, со последователно ограничување на трошењето.
„Во конструктивни разговори со Европската комисија, германската влада успешно се договори за повеќегодишен пат на дозволен раст на нето-примарните трошоци на јавната администрација за периодот 2025–2029“, изјави официјален претставник од Берлин.
Според договорот, во 2025 и 2026 година ќе се реализира значително зголемување на инвестициите, особено во инфраструктура, безбедност и одбрана. Потоа, ќе следува забавување на растот на потрошувачката со цел постепено враќање кон буџетска рамнотежа.
Планот, кој треба да биде усвоен од германската влада во среда, вклучува и мерки за структурни реформи, со кои се очекува да се зголемат јавните приходи.
„Овој документ испраќа силна порака за економски раст и одржани јавни финансии“, изјавија од германското Министерство за финансии.
Фискално-структурниот план се повикува и на одлуките на германскиот Кабинет од 24 јуни и е придружен со изјава од Советот за стабилност, кој ги претставува германските сојузни покраини.
Според официјалните лица, договорот е постигнат благодарение на флексибилноста што ја овозможуваат новите правила на ЕУ, со кои земјите-членки добиваат повеќе простор за стратешки инвестиции, сѐ додека постои јасна стратегија за среднорочна консолидација.