Владата на Северна Македонија денеска го усвои новиот предлог-закон за игри на среќа, со кој се воведуваат построги правила за регулација на оваа индустрија, која со години беше критикувана за недостаток на надзор. Вицепремиерот Изет Меџити изјави дека целта на законот е заштита на младите и семејствата од негативните ефекти на коцкањето.
„Казината, обложувалниците и клубовите со автомати за игри на среќа повеќе нема да смеат да функционираат во близина на училишта и образовни институции. Ќе ја исчистиме околината на училиштата од влијанието на оваа деструктивна индустрија. Учениците повеќе нема да бидат изложени. Младината ќе биде заштитена – како што и заслужува“, изјави Меџити.
Законот предвидува зголемени даноци, построги лиценцни критериуми и засилени контроли врз операторите. Според владата, со новата регулатива ќе се отстранат од пазарот оние компании кои го злоупотребуваат системот и ги манипулираат потрошувачите.
„Ставаме крај на ерата кога профитот од коцкањето беше поважен од благосостојбата на граѓаните. Ова е закон за обичниот човек – закон што го штити ученикот, родителот и семејството“, додаде Меџити, нагласувајќи дека постои политичка волја за суштински промени.
Предлог-законот се оценува како чекор кон сеопфатна реформа во секторот за игри на среќа, со цел обезбедување транспарентност, одговорност и заштита на јавниот интерес.