Три водечки политички групи во Европскиот парламент – Европската народна партија (ЕПП), Прогресивната алијанса на социјалистите и демократите (С&Д), и Обнова за Европа – се согласија да ги отстранат сите споменувања на „македонскиот идентитет“ и „македонскиот јазик“ од нацрт-извештајот за напредокот на Северна Македонија, соопшти бугарскиот европратеник Андреј Ковачев во четвртокот.
Ковачев, член на ЕПП, изјави дека очекува амандманот да биде усвоен со мнозинство гласови на пленарната седница следната недела.
„Прашањата поврзани со идентитетот и јазикот немаат место во извештај за напредок на земја кандидат за членство во ЕУ. Тие предизвикуваат поделби и отвораат Пандорина кутија. Ова особено се потврдува со континуираните изјави од властите во Скопје, особено од премиерот Мицкоски, со неговите манипулации за ‘вековен идентитет и јазик’“, напиша Ковачев на Фејсбук.
Тој им се заблагодари на бугарските европратеници за, како што рече, нивниот единствен став по ова прашање.