Порталот на албански јазик Тетовасот (ТС) тврди дека ги поседува резултатите од последната анкета на Меѓународниот републикански институт (IRI), спроведена во мај и јуни годинава врз репрезентативен примерок од 1.200 испитаници.
Според порталот, коалицијата „Европски фронт“, – составена од ДУИ, АА-Таравари и АА-Села, – ужива поддршка од 14 отсто на национално ниво. Наспроти тоа, владината коалиција ВЛЕН, заедно со сите нејзини составни партии, има поддршка од 5 проценти.
Според истите извори, резултатите од истражувањето веќе се презентирани пред сите партии и лидери на коалицијата ВЛЕН.
Анкетата доаѓа во пресрет на почетокот на кампањата за локалните избори, за кои аналитичарите предвидуваат остри политички конфронтации, особено во општините со доминантно албанско население.