Тајланд и Камбоџа во неделата се обвинија меѓусебно за нови артилериски напади по должината на спорната граница, само неколку часа откако американскиот претседател Доналд Трамп објави дека лидерите на двете земји се согласиле да работат на прекин на огнот.
И покрај поддршката од Пномпен за итен прекин на огнот, Бангкок изјави дека не може да започне разговори додека, како што тврди, Камбоџа цели врз цивили – обвинување кое камбоџанските власти го негираат.
„Наш услов е да не вклучиме трета страна, но сме благодарни за грижата на претседателот Трамп“, изјави привремениот премиер на Тајланд, Пхумтам Вечајачаи, пред да ги посети пограничните региони. „Предложивме билатерална средба меѓу министрите за надворешни работи за да ги дефинираме условите за прекин на огнот и повлекување на трупите и долгодометното оружје.“
Премиерот на Камбоџа, Хун Манет, во објава на Фејсбук соопшти дека ја прифатил иницијативата на Трамп и претходниот предлог на Малезија за прекин на огнот.
Над 30 загинати, повеќе од 200.000 евакуирани
Четири дена по избувнувањето на најинтензивните судири во последната деценија, бројот на загинати надмина 30 – меѓу нив 13 цивили во Тајланд и осум во Камбоџа, според локалните власти. Над 200.000 лица се евакуирани од пограничните области.
Камбоџанското Министерство за одбрана соопшти дека тајландските сили во неделата наутро нападнале неколку позиции долж границата, вклучувајќи историски храмски комплекси. Воените власти во Тајланд, пак, обвинија дека камбоџанската страна користела долгодометни ракетни фрлачи и напаѓала цивилни цели, вклучително и во провинцијата Сурин.
„За мене е добро ако Тајланд се согласи да запре со борбите – така двата народа ќе живеат во мир,“ изјави студентката Среунг Нита во Пномпен за Ројтерс.
Во провинцијата Сисакет, новинарите на Ројтерс во неделата известија за постојано гранатирање, при што не можеше со сигурност да се утврди од која страна доаѓа огнот.
„Ако има прекин на огнот, ќе биде подобро. Добро е што Америка инсистира на тоа – тоа ќе донесе мир“, рече жителот на Сисакет, Таворн Тусаван.
Трамп посредува, трговски разговори ставени во мирување
Трамп во саботата изјави дека разговарал со премиерите на двете земји и дека тие се согласиле веднаш да започнат разговори за ставање крај на судирите кои започнаа во четвртокот. Тој додаде дека трговските преговори со Тајланд и Камбоџа се во мирување додека не заврши конфликтот.
Двете земји се обвинуваат меѓусебно за иницирање на судирите, кои доаѓаат по убиството на камбоџански војник кон крајот на мај. Тензиите нараснаа во текот на јуни, доведувајќи ја до криза тајландската коалициска влада.
Спорот трае со децении поради недефинирани точки долж 817-километарската граница, со фокус на древните хиндуистички храмови Та Моан Тхом и Преах Вихеар. Меѓународниот суд на правдата му го додели Преах Вихеар на Камбоџа во 1962 година, но тензиите ескалираа во 2008 кога Пномпен се обиде да го регистрира храмот како објект на светско наследство на УНЕСКО.
Во јуни годинава, Камбоџа побара од Меѓународниот суд повторно да се произнесе по граничните прашања. Тајланд, пак, изјави дека не го признава тој суд и дека преферира билатерални преговори.