Северна Македонија го доби арбитражниот спор со дел од инвеститорите на рудникот „Казандол“ во Валандово, соопшти вицепремиерот и министер за транспорт Александар Николоски. Судската одлука значи дека државата нема да плати 115 милиони евра како потенцијална штета, кои инвеститорите ги барале за неотворањето на рудникот.
„Овој случај го добивме. Сите 11 основи по кои државата беше тужена се одбиени и на тој начин се спасени 115 милиони евра потенцијална штета“, рече Николоски. Тој додаде дека новата влада побарала повторно отворање на случајот, бидејќи претходната влада, предводена од СДСМ, во јануари 2023 година го затворила, прифаќајќи обврска за исплата на целосниот износ.
Концесијата за „Казандол“ беше доделена од поранешната ВМРО-ДПМНЕ во 2015 година на компанијата „Сардич“. Според СДСМ, по големиот револт на граѓаните на Валандово, владата го раскинала договорот во март 2018 година, што го отвори патот за арбитражниот спор.
Премиерот Христијан Мицкоски рече дека ова е втора арбитража што владата ја добива и дека очекуваат уште најмалку две во периодот што следува. „Вистинското прашање е како во минатото се губеле арбитражите и како сега наеднаш тие се добиваат во полза на државата. Треба тоа да се истражи“, рече Мицкоски.
Тој додаде дека не е точно дека рудникот „Казандол“ ќе биде повторно отворен. „Сопствениците на инвестицијата изгубија. Тоа значи дека тие веќе немаат концесија и рудникот нема да се отвори“, нагласи премиерот.
На изјавите на Николоски реагираше СДСМ, наведувајќи дека случајот бил затворен во 2023 година и дека тимот кој ги застапувал правата на државата постапувал според насоки од претходната влада. „Николоски ако сака да зборува за ‘Казандол’, треба да им објасни на граѓаните: зошто неговата партија во 2015 година ја даде концесијата? Зошто се игнорираа протестите и барањата на локалното население? Благодарение на граѓанскиот отпор и одлуките на владата на СДСМ, овој рудник не постои“, реагираа од СДСМ.
Поранешниот вицепремиер за економски прашања и пратеник на СДСМ, Фатмир Битиќи, на Фејсбук нагласи дека арбитражата е завршена и дека државата ја добила битката. „Концесијата дадена од ВМРО-ДПМНЕ, симбол на криминал и коруптивни зделки, падна на арбитража. Државата нема да плати штета од 115 милиони евра“, напиша Битиќи. Тој се заблагодари на државните службеници, експертите и адвокатските канцеларии, вклучително White & Case, кои ги застапувале интересите на државата.