Претседателот на САД Доналд Трамп соопшти дека ќе ја стави Метрополитен полицијата на Вашингтон под директна федерална контрола и ќе распореди 800 припадници на Националната гарда во главниот град, со цел борба против криминалот.
Потегот, опишан од градоначалничката на Вашингтон Мјуриел Боусер како „вознемирувачки и без преседан“, ја одзема контролата врз спроведувањето на законот од локалните власти.
Одлуката следи по серија федерални мерки, вклучително и ноќни патроли на ФБИ, и доаѓа иако официјалните податоци покажуваат пад на насилниот криминал во последните две години.
Според Законот за домашно управување, претседателот може да ја преземе контролата врз полицијата во Вашингтон до 30 дена во услови на „специјална вонредна состојба“. Продолжување на тој рок бара одобрување од Конгресот.
Боусер изјави дека ќе се придржува кон наредбата, иако правниците на градот ја разгледуваат законитоста. „Насилниот криминал е на најниско ниво во последните 30 години… Овој потег е вознемирувачки, но не и целосно изненадувачки“, рече таа.
Трамп, зборувајќи во Белата куќа, најави „широка акција на теренот“ со заедничко делување на федералните агенти, Националната гарда и локалната полиција. „Ќе се справиме со беззаконието и ќе ги отстраниме гетата,“ рече тој.
Членовите на Градскиот совет и државниот обвинител на Вашингтон ги осудија мерките, нарекувајќи ги „неоправдани и незаконски“ и нагласувајќи дека нема криминална вонредна состојба.
Националната гарда, според Армијата, засега ќе обезбедува логистичка и административна поддршка, но има овластување да врши апсења доколку биде потребно – што е возможно бидејќи Дистриктот нема статус на сојузна држава.
Трамп ја донесе одлуката откако поранешен вработен во федерална служба беше повреден во обид за кражба на автомобил. Двајца тинејџери од Мериленд беа обвинети за нападот.
Претседателот предупреди дека слични мерки може да следат во Чикаго и Њујорк, каде што не може да ја преземе полицијата, но може да распореди Национална гарда.
Официјалните податоци на полицијата во Вашингтон покажуваат дека насилниот криминал е намален за 26%, а убиствата за 12% во однос на истиот период минатата година.