Лидерите од Блискиот Исток и Европа го поздравија мировниот план на американскиот претседател Доналд Трамп за Газа, при што тој предупреди дека Хамас мора да го прифати договорот или ќе се соочи со воена акција.
Планот, подготвен од Трамп и израелскиот премиер Бенјамин Нетанјаху, предвидува итен прекин на огнот, ослободување на 20 израелски заложници во рок од 72 часа, како и предавање на посмртните останки на повеќе од дваесетина загинати, во замена за стотици притворени Палестинци.
Документот со 20 точки предвидува дека Хамас нема да има улога во управувањето со Газа, а се остава можност за идно создавање палестинска држава – нешто што Нетанјаху повторно го отфрли.
„Ова е историски ден за мирот,“ рече Трамп на прес-конференција во Белата куќа. Тој додаде дека САД ќе му дадат поддршка на Израел „да ја заврши работата против заканата од Хамас“ ако групата не се согласи.
Нетанјаху изјави дека Израел ќе продолжи со операциите ако Хамас го одбие планот или не го испочитува. Тој исто така потврди дека израелската армија ќе остане во Газа, иако тоа не стои во текстот објавен од Белата куќа.
Палестинската управа ја оцени иницијативата на Трамп како „искрена и решителна“ и изрази подготвеност за соработка со САД и регионалните партнери за прекин на војната и доставување хуманитарна помош.
Министрите за надворешни работи на Обединетите Арапски Емирати, Саудиска Арабија, Катар, Египет, Јордан, Турција, Индонезија и Пакистан изразија поддршка за напорите на Вашингтон, повикувајќи на решение базирано на две држави – со целосно интегрирање на Газа со Западниот Брег во палестинска држава.
Европскиот совет претседател Антонио Кошта изјави дека е охрабрен од „позитивниот одговор“ на Нетанјаху, а британскиот премиер Кир Стармер нагласи дека „Хамас треба да се согласи на планот и да ја заврши трагедијата“. Францускиот претседател Емануел Макрон и италијанската премиерка Џорџа Мелони исто така го поддржаа предлогот.
Според планот, Газа привремено ќе ја администрира „технократски, неполитички палестински комитет“, под надзор на ново меѓународно тело наречено Совет за мир, кое ќе го води Трамп. Дел од структурата ќе биде и поранешниот британски премиер Тони Блер, кој го оцени планот како „смел и интелигентен“.
Планот предвидува постепено повлекување на израелските сили и програма за економска обнова на Газа, при што жителите нема да бидат принудени да ја напуштат територијата.
Хамас засега вели дека ќе ги разгледа условите, но инсистира на целосно израелско повлекување и гаранции за палестинска држава во границите од 1967 година.
Според податоците на здравственото министерство во Газа, управувано од Хамас, најмалку 66.055 лица биле убиени од израелските напади од октомври 2023 година, кога израелската воена кампања започна како одговор на нападот на Хамас во јужен Израел, во кој беа убиени околу 1.200 луѓе, а 251 беа киднапирани.