Министрите за надворешни работи на земјите учеснички во Процесот за соработка во Југоисточна Европа (ПСЈИЕ) во четвртокот одржаа состанок во Њујорк, на маргините на Генералното собрание на ОН, со кој беше одбележана 30-годишнината од иницијативата.
Состанокот се одржа во организација на Советот за регионална соработка (СРС) и бугарското претседавање со ПСЈИЕ, а со него копретседаваа генералниот секретар на СРС, Амер Капетановиќ, и шефот на дипломатијата на Бугарија, Георг Георгиев. Настанот беше одржан под мотото „30 години ПСЈИЕ: Насочување кон иднината преку регионална стабилност, безбедност и одржлива трансформација“.
„По три децении, ПСЈИЕ останува најрепрезентативна политичка платформа во регионот, а СРС е тука да го претвори духот на соработка во опипливи резултати што луѓето можат да ги почувствуваат,“ изјави Капетановиќ. Тој додаде дека приоритет ќе биде „попаметна поврзаност, посилни вештини и позелен раст“.
Министрите ја пофалија улогата на СРС и разменија мислења за регионална стабилност, забрзување на зелената и дигиталната трансформација и претворање на заедничките приоритети во конкретни резултати. Тие ја истакнаа важноста на отпорноста преку трансформација и практични политики насочени кон граѓаните.
За време на посетата во САД, Капетановиќ потпиша Писмо за намери со Ивана Живковиќ, помошник-генерален секретар на ОН и директорка на Регионалното биро на УНДП за Европа и Централна Азија, со цел зајакнување на соработката во областа на владеењето, одржливиот развој и отпорноста во Југоисточна Европа.
Капетановиќ учествуваше и на состанокот на министрите за надворешни работи на Јадранско-јонската иницијатива. Неговата посета на САД ќе продолжи во Вашингтон.