Министерството за надворешни работи на Црна Гора соопшти дека на 17 септември испратило вербална нота до Амбасадата на Косово во Подгорица, откако истрели за кои се сомнева дека дошле од територијата на Косово завршиле во близина на ски-центарот Хајла-Штедим, во граничната зона меѓу двете држави, јави Балканвју.
Министерството наведе дека нотата следи по повторени инциденти регистрирани од полицијата во Рожаје и дека на 22 септември за случајот била информирана и амбасадорката на Косово. Од Приштина е побарано да ги идентификува и процесира сторителите и да ја информира Црна Гора за сите преземени мерки.
Досега се регистрирани најмалку два случаи на оштетување на инфраструктурата во ски-центарот, кој се наоѓа на околу еден и пол километар од границата. Во првиот инцидент, во јули 2023 година, беа оштетени делови од кабина. Во вториот, на 24 август оваа година, беше пукано кон друг објект на центарот. Основното обвинителство во Рожае отвори или планира да отвори предмети за случаите.
„Веруваме дека овие изолирани инциденти не го одразуваат јасниот ангажман на нашите две држави за зајакнување на регионалната соработка и подобрување на билатералните односи,“ соопшти МНР за Радио Слободна Европа.
Црногорската страна ја потсети Приштина и на важноста од спроведување на три меѓудржавни договори: за демаркација на границата, за отворање на заедничкиот граничен премин Котлови-Куќиште и за регулирање на режимот на граничен сообраќај.
Од полицијата во Пеќ за РСЕ изјавија дека немаат информации за безбедносни инциденти на границата со Црна Гора, нагласувајќи дека нивниот главен ангажман е „одржување на јавниот ред и мир“. Одговори од централната дирекција на косовската полиција и од Владата на Косово сè уште се очекуваат.
Црногорските медиуми јавија дека ски-центарот сега е под полициска заштита и дека во последните месеци се регистрирани повеќе инциденти, најсериозниот од нив на 24 август. Прашањето било разгледувано и на состанок на општинскиот совет за безбедност во Рожае.
„Слободен сум да кажам дека инцидентот од 24 август ја надминува рамката на безбедносен инцидент и можеби се издигнува на ниво на дипломатски,“ изјавил локалниот шеф за безбедност Владимир Делевиќ.
Аналитичарите ги поврзуваат тензиите со незадоволството околу договорот за демаркација од 2015 година, за кој косовските критичари тврдат дека ја лишил државата од околу 8.000 хектари земја, вклучувајќи ја и областа каде се гради новиот ски-центар. Меѓу најгласните противници на договорот бил поранешниот премиер Рамуш Харадинај, чие родно село е во близина на местото од каде често се пука кон Хајла, а промени во договорот бара и актуелниот премиер Албин Курти.
Црна Гора го ратификуваше договорот во 2015 година, а Косово во 2018 година.