Родителите на 62-те загинати во пожарот во дискотеката во Кочани порачаа на денешниот 24-ти „Марш на ангелите“ дека нема да ги заборават своите деца и дека ќе ја бараат правдата до крај.
Тие побараа од надлежните институции да ја проценат обвинителната постапка и да закажат судски рочишта. Ако тоа не се случи во најскоро време, најавија дека од 3 октомври повеќе нема да има мирни маршеви, туку ќе следат поинтензивни протести и блокади низ земјата.
Трагедијата на 16 март годинава одзеде 62 животи и повреди над 200 млади луѓе. И покрај тоа што поминаа шест месеци, Кривичниот суд сè уште нема закажано рочиште за случајот.
„Овој марш е симбол на единство, достоинство и глас што бара одговорност. Го посветуваме на ангелите што никогаш нема да бидат заборавени и на борбата за вистината што им ја должиме“, се наведува во соопштението на граѓанското здружение „16 март 2025 Кочани“.
Маршот започна од Паркот на револуцијата, помина покрај Трговскиот центар, Општината и Даночната управа, а потоа продолжи до полициската станица, Основниот суд и Обвинителството. Колоната се врати во Паркот на револуцијата.