Сè поострата размена на пораки меѓу премиерот Христијан Мицкоски и лидерот на ДУИ, Али Ахмети, во пресрет на локалните избори, отвора дилеми дали политичкиот судир може да прерасне во меѓуетничка конфронтација.
Со ослабена СДСМ и пораст на популарноста на Левица, ВМРО-ДПМНЕ ја идентификува ДУИ и нејзината коалиција Национална алијанса за интеграција како главен опонент. Дел од аналитичарите сметаат дека ова е судир меѓу две партии кои ја претставуваат македонската и албанската заедница, што наметнува дополнителна чувствителност.
„Залагањето на премиерот Мицкоски за бришење на ДУИ од политичката сцена всушност е вперено кон Албанците,“ вели новинарот и аналитичар Сељадин Џезаири во разговор за Faktor.mk. „Упорното тврдење дека ДУИ е ‘црниот ѓавол’ покажува дека во ВМРО-ДПМНЕ продолжува да се негува антиалбанство, кое не е предизвикано со ништо.“
Џезаири смета дека ваквата реторика само ќе го продлабочи јазот меѓу Македонците и Албанците. Тој предупредува на систематско деградирање на уставната положба на Албанците, како и на случаи на отстранување на албанскиот јазик од јавната употреба, вклучително и од патната сигнализација.
Политичкиот судир, според него, може да се протолкува како обид Македонците да ги решаваат прашањата во албанскиот политички камп. „Албанската страна нема да стои со скрстени раце,“ додава тој.
По падот на СДСМ на парламентарните избори, ДУИ се позиционира како главна опозиција. Иако Левица бележи раст, Џезаири смета дека ударот на Мицкоски останува насочен кон Ахмети. „Можеби опасноста ја гледа токму во подемот на Левица, па затоа игра на старата карта – антиалбанството,“ вели тој.
Тој предвидува дека локалните избори ќе покажат колку ваквата владина агресивност ќе има политичка цена. „ДУИ ќе продолжи да игра примарна опозициска улога, не само дома туку и во однос на евроинтеграциите и политиката кон соседите,“ додава Џезаири, посочувајќи на предупредувањата од Брисел за влијанието на т.н. „српски свет“.
Во кампањата за локалните избори, наместо дебата за екологија или урбанизам, во фокусот се меѓуетничките односи. „Постојат илузии дека со заминувањето на ДУИ од политичката сцена ќе завладее мир. Реалноста е посложена – силен албански фактор како ДУИ беше гаранција за компромиси и толеранција,“ вели Џезаири. „Без тоа, ризикот е дека ќе нè боли главата.“