Десетици општини во Франција во понеделникот го кренаа палестинското знаме на своите згради, игнорирајќи ја забраната од министерството за внатрешни работи и ставот на градоначалничката на Париз, Ан Идалго, додека претседателот Емануел Макрон подготвуваше објава за признавање на палестинска држава на Обединетите нации.
Левичарски политичари и про-палестински активисти за кратко време развија големо знаме на Градското собрание во Париз, пред тоа да биде симнато по околу половина час. Министерот за внатрешни работи Бруно Реталео минатата недела издаде упатство до префектите да спречат поставување на палестинското знаме, повикувајќи се на принципот на неутралност во јавната служба.
Министерството соопшти дека најмалку 86 општини управувани од левичарски партии, меѓу кои Лион, Нант и Рен, го поставиле знамето. „Нашата одговорност е да го одбиеме молкот и да направиме сѐ што можеме за да ставиме крај на ужасот,“ изјави градоначалничката на Рен, Натали Апер.
Во Сент-Дени, лидерот на Социјалистичката партија Оливие Фор присуствуваше на церемонијата и порача дека палестинското знаме „не е знаме на Хамас, туку знаме на луѓе кои имаат право на слобода и самоопределување“.
Франција има најголема еврејска заедница во Западна Европа и значајна муслиманска популација, а прашањето околу Палестина ја засилува политичката и општествената напнатост. Едновремено, Ајфеловата кула беше осветлена со симболите на мирот и знамињата на Израел и Палестина, додека Идалго напиша дека Париз ја потврдува поддршката за решение со две држави.