Попладнево сообраќајот во главниот град беше во целосен застој поради обилниот дожд и протестот на граѓанската иницијатива „Стоп за Вардариште“ во Аеродром. Автомобилите се движеа со големи доцнења, а возачите на одредени делници беа заглавени и по 45 минути.
Протестот се одржа кај мостот „Близнаци“, каде граѓаните изразија револт поради континуираното палење на депонијата „Вардариште“ и загадувањето на воздухот. Организаторите најавија тричасовна блокада на мостот, од 15:00 до 18:00 часот, како дел од засилените активности за барање итно решение.
Министерството за внатрешни работи претходно информираше за посебен сообраќаен режим и затворање на неколку сообраќајници, меѓу кои делови од булевар „Гоце Делчев“.
Жителите на Аеродром најавија дека протестите ќе продолжат сè додека, како што велат, институциите не обезбедат трајно затворање на депонијата.