Поранешниот градоначалник и амбасадор Андреј Жерновски изјави дека ВМРО-ДПМНЕ изгубила околу 140.000 гласа во споредба со претходните избори, оценувајќи го тоа како „најголемиот и најбрзиот пад на било која владејачка партија во историјата на македонскиот политички плурализам“.
„Кога ги објавив овие бројки во август, Мицкоски и ВМРО-ДПМНЕ очајнички се обидуваа да демантираат, но вчерашното гласање ги демантираше нив,“ напиша Жерновски на Фејсбук.
Тој додаде дека споредбените анализи покажуваат дека ВМРО-ДПМНЕ и движењето Знам изгубиле речиси една третина од гласовите од претходните избори.
„Трендот е јасен и ќе продолжи со исто темпо,“ наведе Жерновски, додавајќи дека и СДСМ треба да направи внатрешна анализа и да се фокусира на враќање на довербата, особено во Скопје кое го нарече „најголем предизвик“.
Жерновски им честита на победниците на изборите, посакувајќи им „плоден мандат и повеќе работа за граѓаните“.