Светската здравствена организација (СЗО) ја започна годинешната глобална кампања „Месец на свесност за ракот на дојка“, со порака дека секоја приказна зад дијагнозата е различна и секое патување заслужува поддршка, достоинство и еднаков пристап до здравствена заштита.
Ракот на дојка е најчесто дијагностицираниот карцином кај жените во светот. Во 2022 година, 2,3 милиони жени добиле дијагноза, а околу 670.000 починале од болеста, според податоците на СЗО. Иако стапките на петгодишно преживување во земјите со високи приходи надминуваат 90%, тие паѓаат на 66% во Индија и 40% во Јужна Африка, поради нееднаквиот пристап до рано откривање, дијагноза и лекување.
„Местото каде што живее жената не треба да биде фактор што ќе одлучи дали ќе преживее,“ порача СЗО, предупредувајќи дека доколку сегашниот тренд продолжи, бројот на нови случаи и смртноста ќе се зголемат за 40% до 2050 година.
СЗО преку Глобалната иницијатива за рак на дојка (GBCI), основана во 2021 година, работи со земјите за намалување на смртноста преку зајакнување на здравствените системи. Иницијативата промовира стратегија со т.н. 60–60–80 цели: 60% од инвазивните карциноми да се дијагностицираат во првите две фази, пациентите да добијат дијагноза во рок од 60 дена, и 80% од пациентите да ја завршат препорачаната терапија.
Во рамки на октомвриската кампања, ќе се одржат локални и глобални настани, вклучително и прегледи, обуки, јавни дебати и дигитални кампањи со хаштагот #EveryStoryIsUnique. На 8 октомври е закажан Третиот неформален состанок на партнерите на GBCI, на кој ќе биде промовиран прирачник за градење капацитети за имплементација на иницијативата.
СЗО ги повикува граѓаните, институциите и организациите да се приклучат преку споделување лични приказни, организирање настани за подигање на свеста, застапување за подобри политики и поддршка на локални здруженија.