Седмото издание на Дигиталниот самит на Западен Балкан (ДСЗБ) започна во четврток во Скопје, коорганизиран од Владата на Северна Македонија и Советот за регионална соработка (СРС). Настанот ја потврдува заложбата на регионот за дигитална трансформација, продлабочена соработка и приближување кон европските интеграции.
Генералниот секретар на СРС, Амер Капетановиќ, во воведното обраќање ги истакна досегашните постигнувања и идните приоритети. „Дигитализацијата не е само цел, таа е трансформативна сила. Успехот на нашиот режим ‘Roam Like at Home’ покажува што регионот може да постигне кога работиме заедно. Сега мораме да ги направиме следните чекори: изградба на интероперабилни дигитални ID паричници, унапредување на доверливите услуги, усогласување со дигиталните рамки на ЕУ и обезбедување на алатки за младите и бизнисите за да напредуваат во дигиталната ера,“ изјави тој.
Премиерот на Северна Македонија, Христијан Мицкоски, кој официјално го отвори Самитот, нагласи дека вложувањето во дигитализација е клучно за економскиот развој и стабилноста на регионот. „Кога луѓето ќе почнат да гледаат опипливи резултати од дигиталната трансформација, довербата расте и се создава моментум што поттикнува понатамошен напредок и иновации,“ рече Мицкоски.
Меѓу говорниците на отворањето беа и: Ренате Николaj, заменик генерален директор за комуникациски мрежи, содржина и технологија во Европската комисија; Томас Ламанаускас, заменик генерален секретар на Меѓународната телекомуникациска унија; Томас Јарзомбек, парламентарен државен секретар во германското Министерство за дигитализација и модернизација на владата; и Свјатослав Сенјута, регионален лидер за владини решенија во Visa. Тие ја истакнаа потребата од регионална координација, усогласување со европските стандарди и градење силни партнерства со приватниот сектор.
Подоцна во текот на денот, Данијела Гачевиќ, раководител на Програмскиот оддел во СРС, ќе модерира министерски панел на тема „Дигитално по дефиниција – Јавните услуги во функција на сите“. На него ќе учествуваат министри и високи претставници од регионот, меѓу кои: Делина Ибрахимај, министерка за економија и иновации на Албанија; Мараш Дукај, министер за јавна администрација на Црна Гора; Стефан Андоновски, министер за дигитална трансформација на Северна Македонија; Славиша Антиќ, државен секретар во српското Министерство за информации и технологија; Гетоар Мјеку, заменик министер за економија на Косово; и Алмир Бањевиќ, директор на IDDEEA во Босна и Херцеговина.
Во следните два дена, носители на одлуки, експерти и иноватори од Западен Балкан, Европската унија и пошироко ќе дебатираат за дигитални јавни услуги, дигитален паричник, интероперабилност, вештачка интелигенција, сајбер-безбедност, е-услуги и развој на дигитални вештини.
Дигиталниот самит на Западен Балкан се одржува во рамките на Акцискиот план за Заедничкиот регионален пазар и Планот за раст на ЕУ, а е кофинансиран од Европската унија.