Битката околу иднината на проширувањето на Европската унија повторно се отвори на самитот во Копенхаген, каде што лидерите бараат начин да ја заобиколат тврдата опозиција на Унгарија кон кандидатурата на Украина – додека неколку земји инсистираат да го зачуваат сопственото право на вето.
Дипломатски извор за Politico вели дека Будимпешта не е единствената што игра со блокади. „Очигледно Унгарците ги блокираат Украинците. Но, тоа не е сè. Бугарите сакаат да можат да ги блокираат Македонците, Хрватите сакаат да ги контролираат Србите, Грција и Кипар не сакаат Турција да се приближи до ЕУ, а Грција, исто така, би сакала да ја држи на око Албанија,“ вели дипломатот.
Претседателот на Европскиот совет, Антонио Кошта, предложи промена на правилата за да може почетокот на преговорите да се одобрува со квалификувано мнозинство, наместо со едногласност. Тоа би ја отворило вратата не само за Украина, туку и за Молдавија, чии кандидатури се врзани една со друга.
Но, планот на Кошта веќе се соочува со силен отпор од Франција, Холандија и Грција, кои стравуваат дека ќе ја изгубат моќта да ги блокираат соседите со кои имаат отворени спорови. Париж и Атина со години ја кочат Турција, додека Софија го условува членството на Северна Македонија.
Премиерот Виктор Орбан, најблискиот сојузник на Кремљ во рамките на ЕУ, останува најгласен противник на Киев. Но аналитичарите велат дека и други земји гледаат корист во зачувување на правото на вето – од национални интереси до внатрешнополитички сметки.
Претседателката на Европската комисија, Урсула фон дер Лајен, тврди дека Украина може да стане членка до 2030 година, но патот кон тоа останува неизвесен. За претседателот Володимир Зеленски и молдавската претседателка Маја Санду, застојот има висока цена – бидејќи иднината во ЕУ ја претставуваат како единствена алтернатива на руската сфера на влијание.