Студена воздушна маса од северна Европа се спушта кон централните и јужните делови на континентот и во наредните денови ќе го зафати и Балканот, соопштуваат европските и регионалните метеоролошки служби.
Температурите во скандинавските земји паднаа под –30 Целзиусови степени, додека во Србија и делови од регионот денес се забележуваат големи температурни разлики, од 6 до 20 степени, поради силна промена на воздушните маси.
Српската метеоролошка служба (РХМЗ) предупреди дека викендов се очекува нагло заладување со дожд кој ќе преминува во снег, прво на запад и север на земјата, а потоа и во други подрачја. Метеоролозите прогнозираат дека температурите ќе паднат до нулата, со можност за локални снежни врнежи.
Во делови од јужна Србија, Косово и Северна Македонија се најавуваат обилни врнежи од дожд, со опасност од зголемен водостој и појава на локални поплави.
Метеоролозите наведуваат дека ладниот бран ќе трае неколку дена, а стабилизација на времето се очекува кон средината на следната недела.