Европската унија пронајде решение што ѝ овозможува на Украина технички да ги започне пристапните разговори, и покрај блокадата од Унгарија, отворајќи можност Киев брзо да напредува кон членство.
Решението, подготвено од данското претседателство со ЕУ и Европската комисија, предвидува т.н. „frontloading“ формат, со кој преговорите можат да почнат без формално отворање на преговарачките кластери. Данска, која за 20 дена го завршува претседавањето со Советот на ЕУ, бараше начин да го заобиколи ветото на унгарскиот премиер Виктор Орбан.
На 11 декември, на состанок во Лавов, ЕУ ѝ ги предаде на Украина своите преговарачки позиции за три кластери, со што техничките разговори може да продолжат. Украина може да работи и да ги заврши овие кластери, а нивното формално отворање и затворање би можело да следи речиси истовремено откако Унгарија ќе ја тргне блокадата, наведуваат извори запознаени со процесот.
Ова го отвора патот кон брза подготвеност за пристапување — но само доколку Украина ги спроведе реформите наведени во насоките што ги доби денес.
Данската министерка за европски прашања Мари Бјере изрази уверување дека напредокот ќе биде брз. „Кога блокадата ќе биде тргната — а целосно сум уверена дека ќе биде — ќе можеме многу брзо да ги отвориме и затвориме овие кластери, потврдувајќи дека Украина е подготвена за членство“, рече таа.
По стартот на техничките разговори, ЕУ и Украина се согласија и за приоритетен план со 10 точки, со фокус на борба против корупцијата и зајакнување на владеењето на правото.
Европската комисија потврди дека конечната одлука за членство и натаму бара едногласност од сите земји членки, но дека техничката работа и усогласувањето со правото на ЕУ може да продолжат. Сличен пристап ќе се примени и за Молдавија, чија кандидатура исто така е заглавена поради внатрешни блокади во Унијата.