Германскиот канцелар Фридрих Мерц изјави во средата дека Црна Гора е „веројатно најнапредниот кандидат“ за членство во Европската унија и дека Берлин е подготвен наскоро да го направи следниот чекор кон изработка на пристапен договор со земјата.
„Сакам ова јасно да го кажам: особено со Црна Гора, која веројатно е најнапредниот кандидат, сега би можеле да го направиме следниот чекор и во блиска иднина да започнеме со работа на пристапен договор“, рече Мерц на заедничка прес-конференција со хрватскиот премиер Андреј Пленковиќ.
Тој оцени дека тоа е „во наш сопствен интерес“, бидејќи „колку сме потесно поврзани, толку подобро можеме заеднички да дејствуваме во Европа“, особено кога станува збор за ограничување на нерегуларната миграција.
Мерц претходно изјави дека со Пленковиќ разговарал за „можното проширување на Европската унија“, нагласувајќи дека Хрватска, поради својата геополитичка и географска близина, има голема одговорност во регионот на Западен Балкан.
„Хрватска ја презема таа одговорност на многу совесен начин, што го покажува и кон нас. Тоа е поврзано и со историските врски на земјата со целиот регион“, рече Мерц, додавајќи дека е благодарен што Загреб активно се залага за интересите на регионот.
Двајцата лидери се согласија дека Европската унија мора да понуди јасна перспектива за членство и дека тешките реформи во земјите кандидати мора да бидат проследени со напредок во пристапниот процес.
„Во исто време, неопходните услови мора да ги исполни секој кандидат поединечно“, рече Мерц, фокусирајќи се на Црна Гора.