Премиерот Христијан Мицкоски денеска ги повика иселениците да се вратат во Македонија, истакнувајќи дека државата не смее да ги губи граѓаните кои стекнале знаење и искуство надвор, а потоа одлучиле да се вратат.
На Форумот на повратници, Мицкоски рече дека голем дел од иселените не заминале од инает, туку барале подобро образование, работа, достоинствена плата и стабилен живот. Премиерот нагласи дека државата мора да ги разбере причините за заминувањето и да обезбеди функционални услови за враќање.
„Вашето враќање не е симболично, туку суштинско. Македонија не е заборавена, корените не се пресечени, а љубовта кон домот не исчезнува“, рече Мицкоски. Тој додаде дека владата ќе обезбеди стабилност, правна сигурност и поддршка за инвестиции за сите што сакаат да се вратат и да придонесат за развојот на земјата.
Форумот вклучуваше и обраќања на повратници кои веќе започнале бизниси и работат во различни сектори, како и претставници на институции задолжени за поддршка на враќањето и инвестициските активности.
Мицкоски претходно, преку статистички податоци, ја истакна тенденцијата на постепено враќање на дел од иселените во последната деценија и го поврза тоа со раст на вработеноста и намалување на невработеноста.
„Држава не се гради само со институции, туку со знаење, искуство и одговорност. Ни треба секој Македонец што сака да придонесе за татковината“, додаде премиерот.