Скопје денеска ја започнува празничната програма со свечено осветлување на новогодишната елка и отворање на божиќниот базар на плоштадот „Македонија“, со што официјално почнува предновогодишното празнување во главниот град.
Градските власти соопштија дека елката ќе светне во 18 часот, по што ќе следи музичка програма со настапи на домашни изведувачи. За дочекот на Новата 2026 година најавени се концерти на македонски музички ѕвезди, меѓу кои Каролина Гочева, Тамара Тодевска, Миле Кузмановски и други.
Градоначалникот на Скопје, Орце Ѓорѓиевски, изјави дека и оваа година нема да има новогодишен огномет на плоштадот, додавајќи дека одлуката е во насока на поддршка на поодржливи и алтернативни форми на празнување.
„Ги поканувам скопјани заедно да го осветлиме градот и да уживаме во празничната атмосфера“, рече Ѓорѓиевски.
Празничната програма ќе трае до крајот на декември и ќе вклучува концерти, културни настани и активности за сите генерации.