Управата за јавни приходи (УЈП) соопшти дека испратила околу 10.000 покани до граѓани за пријавување и оданочување на доход остварен во странство, што предизвика реакции и најави за протести, особено во Куманово.
Според податоците на УЈП, по испратените покани околу 1.200 лица доброволно поднеле даночни пресметки, додека на приближно 1.300 лица им биле издадени даночни решенија. За овие околу 2.500 случаи, вкупниот пресметан данок изнесува близу еден милион евра, а контролите продолжуваат и во други градови.
Дел од граѓаните во Куманово најавија протести откако добиле решенија за плаќање персонален данок на доход за приходи остварени од 2020 година наваму. Станува збор, главно, за лица кои работеле во американски воени бази во Ирак и Авганистан, а примале исплати на сметки во Северна Македонија.
Директорката на УЈП, Елена Петрова, изјави дека не станува збор за нова мерка или за ретроактивно оданочување, туку за законска обврска која важи за сите даночни резиденти и опфаќа пријавување на целокупниот светски доход, вклучително и приходите стекнати во странство.
„Обврската постои со години и е утврдена во Законот за персонален данок на доход. Фактот дека во минатото не била доследно применувана не значи дека не постоела“, рече Петрова.
Од УЈП појаснуваат дека граѓаните нема да бидат двојно оданочени доколку за истиот доход веќе платиле данок во друга држава, согласно меѓународните договори и домашната регулатива. Даночните обврзници кои сметаат дека им се повредени правата имаат можност да ги искористат редовните правни механизми.
Властите наведуваат дека процесот на проверки и оданочување ќе продолжи, додека граѓанските иницијативи бараат појаснување на постапките и поголема транспарентност во примената на даночните правила.