Советот на Европската унија во четвртокот воведе рестриктивни мерки против уште шест лица поради, како што наведе, нивната улога во руските хибридни активности, особено странска манипулација и мешање во информации насочени кон ЕУ, нејзините земји членки и партнери.
На листата на санкционирани се најдоа телевизиските водители Дмитриј Губерниев, Екатерина Андреева и Марија Сител, како и пропагандистот Павел Зарубин, кои, според Советот, работеле за или поддржувале руски државни пропагандни медиуми и учествувале во емисии и настани на кои се ширела дезинформација за војната во Украина и се величел режимот на рускиот претседател Владимир Путин.
Мерките ги опфаќаат и актерот Роман Чумаков и руско-украинскиот балетан Сергеј Полунин, за кои ЕУ наведува дека преку својата јавна и професионална дејност промовирале проруска пропаганда, теории на заговор и антиукраински и антизападни наративи поврзани со руската инвазија на Украина.
Советот соопшти дека сите шест лица активно придонесувале за руските воени напори, вклучително и преку собирање средства за руските вооружени сили.
Со оваа одлука, санкциите поврзани со руските дестабилизирачки активности сега се применуваат на вкупно 65 физички лица и 17 правни субјекти. Мерките вклучуваат замрзнување на имотот, забрана за ставање финансиски средства на располагање, како и забрана за влез или транзит низ територијата на ЕУ.
Релевантните правни акти се објавени во Службениот весник на Европската унија.
ЕУ воведе рамка за вакви рестриктивни мерки во октомври 2024 година, со цел да одговори на, како што ги оценува, руските активности што ги поткопуваат безбедноста, стабилноста и демократските институции на Унијата и нејзините партнери.
Во мај 2025 година, Унијата го прошири опфатот на санкцискиот режим, овозможувајќи таргетирање на материјални средства поврзани со дестабилизирачки активности, нивни финансиски поддржувачи, како и суспензија на лиценци за емитување на руски медиуми вклучени во ширење дезинформации.
ЕУ соопшти дека ќе продолжи да ги користи сите расположливи инструменти за да ги спречи и одврати, како и да одговори на, како што наведе, злонамерните хибридни кампањи на Русија.