Семејствата на жртвите од разорниот пожар во барот „Ле Констелацион“ во швајцарскиот ски-центар Кран-Монтана во петокот се соочуваат со неизвесно и мачно чекање, додека властите продолжуваат со идентификацијата на загинатите и повредените.
Пожарот, кој избувна за време на новогодишната ноќ, одзеде околу 40 животи, а најмалку 119 лица беа повредени, од кои дел се во критична состојба, соопштија локалните власти.
Група од 15 млади луѓе од Италија, кои допатувале од Милано за да ја дочекаат Новата година, се нашле меѓу посетителите на барот. Осуммина успеале да избегаат, тројца се меѓу тешко повредените, додека четворица и натаму се водат како исчезнати, меѓу нив и двајца 16-годишници.
Швајцарските обвинители соопштија дека првичните наоди укажуваат оти пожарот најверојатно бил предизвикан од прскалки (sparklers) поставени во шишиња шампањ, кои се приближиле до таванот на објектот.
„Од таму огнот се проширил исклучително брзо“, изјави Беатрис Пијуд, главна обвинителка на кантонот Вале, додавајќи дека се анализираат видеоснимки и се испрашуваат сведоци.
Истрагата, според обвинителството, ги испитува и материјалите на таванот, вклучително и акустичната пена, за да се утврди дали биле во согласност со безбедносните прописи и дали придонеле за брзото ширење на огнот.
Началникот на кантоналната полиција, Фредерик Гислер, изјави дека од повредените 113 лица веќе се формално идентификувани. Меѓу нив има 71 швајцарски државјанин, 14 француски, 11 италијански, четири српски, како и по еден државјанин на Босна и Херцеговина, Белгија, Луксембург, Полска и Португалија. Националноста на 14 повредени сè уште не е потврдена.
Идентификацијата на загинатите, според властите, може да трае со денови поради сериозните изгореници, а од семејствата е побарано да достават информации за тетоважи или накит што жртвите можеби ги носеле.
Меѓу првите јавно идентификувани жртви е 17-годишен италијански голфер, кој живеел во Дубаи, соопшти Италијанската голф федерација.
Во меѓувреме, на социјалните мрежи се појавија апели за информации за исчезнати тинејџери од Швајцарија, Франција и Велика Британија, додека локалната заедница во Кран-Монтана е во состојба на колективна тага.
„Ова е болка што ја чувствуваме сите, како да изгубивме некој близок“, изјави еден жител на градот.
Швајцарската влада прогласи неколкудневна национална жалост, додека истрагата за причините и одговорноста за една од најтешките трагедии во земјата во последните години продолжува.