Нема никаков договор меѓу Изет Меџити и Билал Касами за раководење со коалицијата ВЛЕН, изјави заменик-премиерот Арбен Фетаи, оценувајќи ги како „спин“ на ДУИ информациите за наводен договор.
Говорејќи во емисијата „Клик Плус“ на TV21, Фетаи рече дека на состаноците на коалицијата не бил разгледуван, ниту постигнат каков било договор за моделот на раководење.
„Ова прашање не е дискутирано на ниво на лидери или во тесното претседателство. Разгледани се повеќе сценарија – ротација, еден претседател или претседателство со двајца копретседатели – но не е донесена никаква одлука“, изјави тој.
Според Фетаи, коалицискиот договор предвидува одлуките да се носат со консензус и колегијалност во рамките на тесното претседателство. Тој додаде дека досега нема согласност за ниту еден од споменатите модели и дека разговорите ќе продолжат во наредните денови.
„Ова е, во најдобар случај, смешно, а во најлош случај злонамерно. Верувам дека станува збор за спин на ДУИ со цел да се разедини ВЛЕН“, рече Фетаи.
На прашањето дали недостигот од договор може да доведе до поделби во коалицијата, тој ја отфрли таквата можност.
„ВЛЕН е пообединет од кога било. Сите сме согласни дека треба да се обединиме и да се зајакнеме. Врз основа на колегијалност, еднаквост и консензус, уверен сум дека наскоро ќе го најдеме најдобриот можен модел за понатамошно функционирање“, изјави Фетаи.