Контроверзии и критики го следат предлог-законот за високата раководна служба во државната управа, со кој владата најавуваше дека ќе стави крај на партиските вработувања и ќе го професионализира јавниот сектор. Законските измени предвидуваат избор на професионалци за 49 директори и нивни заменици, 19 државни секретари и членови на управни одбори во 13 институции, но граѓанскиот сектор оцени дека тоа ќе опфати само пет отсто од институциите во јавната администрација и нема да обезбеди вистинска департизација.
„Со ова решение не се разграничува професионалното од политичкото управување, отсуствуваат јасни критериуми за изборот, а Владата и министрите и понатаму уживаат дискреционите овластувања за именување и разрешување, што ја остава администрацијата ранлива на клиентелизам и политички реваншизам“, оценува Институтот за демократија „Социетас цивилис“ во анализа за Радио Слободна Европа.
Министерот за администрација Горан Минчев, во интервју за Радио Слободна Европа, ги оцени овие забелешки како „неприфатливи“ и најави нова јавна дебата за законското решение на 18 февруари. Тој тврди дека дискреционото право на власта и министрите да изберат кандидат од трите најдобри е дел од европската практика и дека високите раководители мора да ги спроведуваат политиките на владата за да се обезбеди функционалност на институциите.
Невладините организации, како и претставници на меѓународната организација СИГМА, предупредуваат дека врзувањето на мандатот на државните секретари со мандатот на Владата ја прави администрацијата зависна и ранлива на политички промени. „Наместо да бидат независни и професионални, државните секретари ќе останат зависни од функционери чиј мандат е условен од политичките промени“, се вели во анализа на граѓанскиот сектор.
Професорот Борче Давитковски додава дека дискреционите овластувања на комисиите за избор на директори можат да доведат до повторување на конкурсите сè додека не се избере „нивниот кандидат“, што го продлабочува ризикот од политичко влијание.
Законот е дел од долга дебата за јавната администрација во последните десет години. Ова е трет нацрт-закон за високи раководители објавен на ЕНЕР, но прв за кој ќе се дебатира во Собранието, што го прави клучен тест за реформата на администрацијата и граѓанскиот сектор.