Новиот генерален секретар на ВМРО-ДПМНЕ и пратеник во Собранието на Северна Македонија, Драган Ковачки, изјави дека поседува највисок национален безбедносен сертификат со степен „државна тајна“, како и највисок безбедносен сертификат од НАТО.
Ковачки, гостувајќи во емисијата „Тема на денот“ на телевизија Сител, ги отфрли обвинувањата на опозициската СДСМ поврзани со неговиот безбедносен статус, наведувајќи дека националниот сертификат му бил издаден во период кога на власт биле СДСМ и ДУИ.
„Ова е национален безбедносен сертификат – државна тајна, издаден во време на СДС и ДУИ, а не во време на ВМРО-ДПМНЕ. Тоа е највисокиот степен на безбедносен сертификат што постои во државата“, рече Ковачки.
Тој додаде дека поседува и највисок НАТО безбедносен сертификат, што, како што наведе, му овозможува учество на затворени седници на Парламентарното собрание на НАТО, каде што ја предводи македонската делегација.
„Со тој сертификат учествувам на затворени седници на НАТО парламентарното собрание, на кои ја предводам македонската делегација“, изјави Ковачки.
Тој оцени дека јавните обвинувања околу неговиот безбедносен статус нанесуваат штета не само на партијата, туку и на државата, повикувајќи на фокусирање на политиките наместо на лични напади.