Професорите на државните универзитети ќе подлежат на реизбор на секои седум години, а за напредување во академско звање ќе мора да имаат најмалку три трудови објавени во меѓународни списанија со импакт-фактор, предвидува новиот Закон за високо образование што денеска го презентираше министерката за образование и наука Весна Јаневска.
Законот, кој треба да го замени актуелниот од 2018 година, воведува построги критериуми за академско напредување, нов модел на финансирање на универзитетите и реорганизација на Агенцијата за квалитет во високото образование.
„За еден универзитет да се најде меѓу најдобрите 1.000 на Шангајската листа, потребно е годишно да објавува најмалку 1.200 трудови во списанија со импакт-фактор. Нашите универзитети објавуваат меѓу 300 и 500 и тоа мора да се промени“, изјави Јаневска на прес-конференција.
Според предложените измени, кандидатите за избор во звања доцент, вонреден и редовен професор ќе мора да имаат вкупно шест до седум научни трудови, од кои најмалку три објавени во списанија индексирани во базите Web of Science или Scopus.
Законот предвидува и нов начин на финансирање на високообразовните установи, со воведување развојна и компонента за успешност, со цел стимулирање на конкуренцијата и квалитетот.
Ректорите повторно ќе се избираат со мандат од четири години, наместо досегашните три, а изменет е и моделот за нивен избор. Реизборот на редовните професори нема да се применува ретроактивно.
Во делот на студиските програми, се воведува модуларен систем, со заеднички основни студии во првите две години и насочување во повисоките години, со цел рационализација на над 1.300 постојни програми.
Предлог-законите за високо образование и за квалитет во високото образование веќе се објавени на Националниот регистар на прописи (ЕНЕР), а јавните расправи се очекува да започнат во наредните две недели. Владата планира трите закони да бидат усвоени истовремено.