Уставен суд поведе постапка за оценување на уставноста на дел од Законот за заштита на децата, кој предвидува парична помош за новороденчиња само ако детето е „родено на територијата на Република Северна Македонија“.
Судот го отвори прашањето дали ваквата одредба создава нееднаков третман меѓу децата родени во државата и оние родени во странство, иако и двете категории имаат родители државјани на Северна Македонија.
„Самото место на раѓање не може да биде основ за ограничување на право кое им припаѓа на државјани по сосема друг основ, односно по потекло“, наведуваат од Судот.
Според уставните судии, постои сомнеж дека законодавецот без разумно и легитимно оправдување ги става во понеповолна положба децата родени надвор од државата, со што може да се повредува начелото на еднаквост гарантирано со член 9 од Уставот.
Судот посочува дека раѓањето во странство не мора да значи трајно иселување, туку може да биде резултат на непланирани околности, патување или здравствени причини.
„Секоја бремена жена има право слободно да патува согласно својата здравствена состојба, а раѓањето во странство може да биде резултат и на непланирани или предвремени околности“, се наведува во соопштението.
Уставниот суд оцени дека местото на раѓање не смее да биде критериум за различен третман на децата на македонски државјани.
Во одделен предмет, Судот ја отфрли иницијативата за оценување на уставноста на измените на Законот за пензиското и инвалидското осигурување, со образложение дека за истото прашање веќе било одлучувано во февруари годинава.