Речиси сите демократи во американскиот Сенат побараа од министерот за одбрана Пит Хегсет објаснување за напад врз основно училиште во Иран, за кој иранските власти велат дека загинале 168 лица, меѓу кои околу 110 деца.
Во писмо испратено до Пентагон, сенаторите поставуваат низа прашања за нападот во градот Минаб, барајќи да се утврди дали американските сили биле одговорни за ударот и дали евентуални погрешни или застарени разузнавачки информации довеле до погодок на училишната зграда.
Пентагон соопшти дека ќе одговори директно на писмото, како и на секоја конгресна кореспонденција.
Американските медиуми, повикувајќи се на прелиминарна проценка на воени истражители, јавуваат дека е „веројатно“ американските сили ненамерно да го погодиле објектот на почетокот на заедничката американско-израелска операција, но дека конечен заклучок сè уште не е донесен.
Хегсет минатата недела изјави дека САД не таргетираат цивили и дека случајот се истражува.
Сенаторите бараат детална истрага
Во писмото, потпишано од речиси сите сенатори од Демократската партија, се поставуваат прашања и за правилата на ангажман во војната.
Сенаторите се повикуваат на изјава на Хегсет на прес-конференција дека во конфликтот нема да има „глупави правила на ангажман“ и бараат да се утврди дали биле почитувани процедурите за спречување на можни воени злосторства.
Ако се потврди американска одговорност, нападот би можел да претставува еден од најтешките случаи на цивилни жртви во децениските американски воени операции на Блискиот Исток.
Сенаторот Гери Питерс, член на Комитетот за вооружени сили, изјави дека станува збор за „ужасна трагедија“.
„Мора да дознаеме точно што се случило и врз основа на фактите да одлучиме за следните чекори“, изјави тој.
Прашањето дополнително ја нагласува политичката поделба во Вашингтон околу војната. Ниту еден сенатор од Републиканската партија на претседателот Доналд Трамп не го потпиша писмото, додека единствениот демократ што не го потпиша беше Џон Фетерман, кој ја поддржа воената операција, но се согласи дека нападот мора да се истражи.
Видео-анализа упатува на американска ракета
Видео-анализи покажуваат дека воена база на Иранската револуционерна гарда во близина на училиштето била погодена со ракета „Томахавк“ – тип крстосувачка ракета што ја поседуваат американските сили.
Видео објавено од иранската новинска агенција Мехр, а потврдено како автентично од независни проверувачи, прикажува ракета неколку моменти пред ударот.
Експертите наведуваат дека присуството на ракета „Томахавк“ и доказите за повеќекратни удари укажуваат дека станува збор за американска операција.
Израел соопшти дека не бил информиран за операции во таа област. Двајца израелски претставници изјавиле за „Вашингтон пост“ дека нападот не бил координиран со израелската војска.
Можна погрешна разузнавачка информација
Според извор запознаен со прелиминарната проценка, можно е нападот да бил резултат на застарени разузнавачки податоци кои погрешно ја означиле локацијата како активен воен објект.
Поранешниот директор на ЦИА и командант на Централната команда на САД, генералот Дејвид Петреус, изјави дека е „трагично веројатно“ американските сили да го извршиле нападот.
„Се чини дека зградата некогаш била дел од поголем ирански поморски комплекс, пред неколку години“, изјави тој, додавајќи дека лично не ги видел сите докази што се разгледуваат.
Од почетокот на американско-израелската воена операција на 28 февруари, сателитски снимки и проверени видеа покажуваат дека биле оштетени и други цивилни објекти, вклучувајќи болници и историски локалитети, додека бројот на цивилни жртви расте.
Иран во меѓувреме продолжува со ракетни и дрон напади врз Израел и врз земји сојузници на САД во Персискиот Залив, при што цел на нападите биле и цивилни и енергетски објекти.