Граѓаните на Кочани вечерва ќе се соберат пред поранешната дискотека „Пулс“ во 02:15 часот по полноќ, во знак на сеќавање на 63-те лица кои загинаа во пожарот што избувна рано наутро на 16 март минатата година.
Трагедијата, една од најтешките во поновата историја на Северна Македонија, однесе 63 животи, додека повеќе од 200 лица беа повредени.
Пред објектот се поставени 63 срца со имињата на жртвите, придружени со цвеќиња и пораки од граѓани, семејства и пријатели кои им оддаваат почит на загинатите.
Во текот на денот во Кочани и околните места се одржуваат верски обреди, комеморации и други настани во спомен на жртвите. Во црквата „Св. великомаченик Георгиј“ беше одржана света архиерејска литургија и помен, предводени од поглаварот на Македонската православна црква – Охридска архиепископија, архиепископот г.г. Стефан.
„Солзите што протекоа во Кочани станаа бол за целиот народ“, изјави архиепископот Стефан, додавајќи дека загинатите „прерано заминати деца, браќа, сестри и пријатели засекогаш ќе недостасуваат“.
Комеморативни настани се организираат и во други градови, меѓу кои и во Виница, каде ќе се одржи помен за две од жртвите.
Годишнината од трагедијата се одбележува со концерти, маршеви и спортски активности, додека семејствата на загинатите и граѓаните повикуваат на правда и одговорност за несреќата.