Иран го назначи Моџтаба Хамнеи за нов врховен лидер на Исламската Република по смртта на неговиот татко, ајатолахот Али Хамнеи, додека војната меѓу Иран и Израел со поддршка од САД влезе во десеттиот ден и ги потресе глобалните пазари на енергија.
Назначувањето на 56-годишниот Моџтаба Хамнеи беше објавено од Собранието на експерти – тело на иранското свештенство задолжено за избор на врховниот лидер – во момент кога конфликтот во регионот продолжува да се продлабочува.
Моџтаба Хамнеи, вториот син на покојниот лидер, долго време важеше за влијателна, но сенковита фигура во иранскиот политички и безбедносен естаблишмент. Аналитичарите велат дека неговите блиски врски со Револуционерната гарда и безбедносните структури му помогнале да изгради широка мрежа на поддржувачи во врвот на системот.
Неговото доаѓање на власт, сепак, отвора и идеолошка дилема за Исламската Република, чија револуција во 1979 година беше заснована врз отфрлање на наследна власт. Новиот лидер сега ќе мора да ја консолидира својата позиција во услови на војна, економски притисоци и неизвесна меѓународна средина.
Нови ракетни и дронски напади меѓу Иран и Израел се регистрирани низ Блискиот Исток, додека израелската војска соопшти дека започнала бран напади во централниот дел на Иран и врз цели поврзани со либанското движење Хезболах во Бејрут.
Во меѓувреме, глобалните цени на нафтата надминаа 100 долари за барел – првпат од 2022 година – поради стравувањата од нарушување на снабдувањето. Пазарите реагираа со пад на азиските берзи, додека аналитичарите предупредуваат на можни нови инфлаторни притисоци доколку конфликтот продолжи.
Компанијата Bapco Energies од Бахреин прогласи виша сила врз своите операции откако ирански напад ја погодил единствената нафтена рафинерија во земјата, според соопштение на компанијата. Сведоци јавија дека густ чад се издигнувал над рафинеријата.
Хезболах соопшти дека негови борци се судриле со израелски сили кои се обиделе да слетаат со хеликоптери во источен Либан, во близина на сириската граница. Според либанските власти, борбите се воделе во областа околу градот Наби Шит.
Иран и неговите сојузници извршиле серија напади во регионот, вклучувајќи и напад со дрон врз островот Ситра во Бахреин, при што биле повредени 32 лица. Истовремено, американската војска соопшти дека уште еден американски војник починал од раните добиени во првичниот ирански контранапад.
Според иранскиот амбасадор во Обединетите нации, во американско-израелските напади загинале најмалку 1.332 ирански цивили, а илјадници се ранети.
Американскиот претседател Доналд Трамп изјави дека одлуката кога ќе заврши војната ќе биде „заедничка“ со израелскиот премиер Бенјамин Нетанјаху, јави израелскиот весник Times of Israel.
Во меѓувреме, Саудиска Арабија остро ги осуди, како што ги нарече, „неприфатливите“ ирански напади врз земјите од Заливот, нагласувајќи дека има право да преземе мерки за заштита на својата безбедност и суверенитет.
Папата Лав предупреди дека ескалацијата на конфликтот може да доведе до „трагедија од огромни размери“, повикувајќи на прекин на насилството во регионот.