Германија сè повеќе се потпира на работници од Индија за да го ублажи хроничниот недостиг на квалификувана работна сила, предизвикан од пензионирањето на постарата генерација и недоволниот број млади кандидати на домашниот пазар.
Иницијативите за регрутација се засилија во последните години, откако германските работодавачи се соочија со тешкотии да пополнат позиции во занаетчиските и техничките професии. Поттик за тоа бил и еден неочекуван контакт во 2021 година, кога претставници на индиска агенција понудиле млади кандидати заинтересирани за стручно образование во Германија.
„Имавме многу очајни работодавачи кои не можеа да најдат работници,“ изјави Хендрик фон Унгерн-Штернберг, поранешен претставник на занаетчиска комора во југозападна Германија. „Решивме да ѝ дадеме шанса на идејата.“
Првично, фокусот бил ставен на месарската индустрија, сектор во пад со децении. Бројот на мали семејни бизниси се намалил значително, а интересот кај младите Германци за вакви занимања опаднал.
Во 2022 година, првата група од 13 млади Индијци пристигнала во Германија за да започне обука. Денес, нивниот број пораснал на околу 200, ангажирани во месарници низ земјата.
Германија се соочува со сериозни демографски предизвици. Според студија од 2024 година, на економијата ѝ се потребни околу 288.000 странски работници годишно за да се избегне намалување на работната сила за 10% до 2040 година.
Партнерствата со индиски агенции за вработување се прошируваат. Новоформираната компанија „India Works“ планира оваа година да донесе 775 млади работници од Индија за различни струки, вклучувајќи градежништво, механика и пекарство.
Олеснување за ваквите процеси донесе договорот за миграција и мобилност меѓу Германија и Индија од 2022 година. Во 2024 година, Германија го зголеми годишниот контингент за работни визи за индиски државјани од 20.000 на 90.000.
Официјалните податоци покажуваат дека бројот на индиски работници во Германија достигнал 136.670 во 2024 година, во споредба со 23.320 во 2015 година.
Многу од младите Индијци наведуваат подобри плати и можности како главни причини за преселба. „Овде платите се високи и можам финансиски да му помогнам на моето семејство,“ вели еден млад пекарски ученик.
Работодавачите велат дека странската работна сила станува клучна за опстанок. „Без работниците од Индија, денес немаше да работиме,“ изјави еден сопственик на месарница.
Локалните власти исто така се соочуваат со недостиг на кадар. Во Вајл ам Рајн, општината планира да вработи наставници од Индија за детски градинки, по неуспешни обиди да најде кадар во земјата.
„Мора да бараме надвор од Германија – тоа е единственото решение,“ изјави градоначалничката Дијана Штекер.