Цените на нафтата пораснаа во вторникот, додека пазарите го следат рокот што американскиот претседател Доналд Трамп му го постави на Иран за отворање на теснецот Ормус, клучна рута за глобалниот енергетски транспорт.
Цената на северноморската нафта Брент порасна за околу 1,4% на 111,33 долари за барел, додека американската сурова нафта WTI поскапе за 2,8% на 115,61 долари за барел.
Трамп во понеделникот му се закани на Иран дека може да биде „збришан за една ноќ“ доколку до вторник во 20 часот по време во Вашингтон не постигне договор со САД.
Испораките на нафта и гас од Блискиот Исток се сериозно нарушени, откако Техеран се закани дека ќе напаѓа бродови кои ќе се обидат да минуваат низ Ормус, како одговор на американските и израелските воздушни напади што траат од 28 февруари.
Иако Трамп изјави дека верува оти „разумни“ ирански лидери преговараат „со добра волја“, тој додаде дека исходот останува неизвесен.
Иран досега ги отфрли предлозите за привремен прекин на огнот и бара траен крај на војната, како и укинување на санкциите.
Аналитичарите оценуваат дека растот на цените укажува оти инвеститорите сметаат дека договорот ќе биде потежок за постигнување од очекуваното и дека конфликтот може да трае подолго.
Во исто време, пазарите се обидуваат да проценат дали Трамп навистина сака договор или само создава простор за можна поширока воена акција.
Во пресрет на рокот, Велика Британија ќе биде домаќин на состанок на сојузнички воени планери и партнери за мерките што би обезбедиле безбеден премин низ Ормус по завршувањето на конфликтот.
Нарушувањата во овој теснец, низ кој вообичаено поминува околу една петтина од светските испораки на нафта и гас, веќе ги зголемија трошоците за енергија ширум светот и ги засилија стравувањата од нов инфлаторен притисок.
Особено погодени се големите азиски економии, како Јапонија и Јужна Кореја, кои во голема мера зависат од енергенси од Блискиот Исток.
Иако дел од бродовите и натаму минуваат низ Ормус, обемот на сообраќај е значително помал од периодот пред почетокот на конфликтот.