Цените на нафтата благо пораснаа во петокот, додека транспортот низ Ормускиот теснец останува сериозно ограничен, и покрај договореното примирје меѓу САД и Иран, што ја одржува неизвесноста на глобалните енергетски пазари.
Американската нафта (WTI) за мај се зголеми за 0,4% на 98,29 долари за барел, додека северноморската нафта Брент за јуни порасна за 0,56% на 96,48 долари за барел, во услови на нестабилно тргување.
И покрај двонеделното примирје, клучниот поморски коридор – преку кој пред конфликтот се транспортираа околу 20% од глобалните испораки на нафта – останува речиси затворен, со минимален проток на танкери.
Американскиот претседател Доналд Трамп ја обвини Иран дека не дозволува нормален транзит, предупредувајќи дека ваквите постапки може да го поткопаат договорот за прекин на огнот. Неговиот економски советник Кевин Хасет изјави дека дури и еден успешно поминат танкер би значел значително олеснување за пазарот.
Во меѓувреме, нападите врз саудиската енергетска инфраструктура дополнително ја влошија ситуацијата. Според саудиските власти, производствениот капацитет е намален за околу 600.000 барели дневно, додека транспортот низ клучниот Исток–Запад нафтовод кон Црвеното Море е намален за околу 700.000 барели дневно.
Овој нафтовод, кој ја поврзува Персискиот Залив со извозниот терминал во Јанбу, стана главна алтернатива за извоз на нафта откако испораките преку Ормускиот теснец станале сè понеизвесни.
Дополнителни напади врз нафтените полиња Манифа и Хураис и неколку рафинерии ја намалија вкупната продукција на Саудиска Арабија, продлабочувајќи ги стравувањата од недостиг на снабдување.
Аналитичарите предупредуваат дека, со намален увоз од Персискиот Залив и продолжени рокови за испорака, купувачите ќе мора да се потпрат на резерви и алтернативни извори најмалку уште еден месец, дури и ако повисоките цени почнат да ја намалуваат побарувачката.
И покрај дипломатските напори, ситуацијата во регионот останува кревка, со ограничен напредок во обновувањето на нормалниот транспорт низ еден од најважните енергетски коридори во светот.