Владејачката ВМРО-ДПМНЕ соопшти дека нема да поддржи уставни измени без конкретни гаранции, додека опозициската СДСМ најави засилување на активностите и формирање поширок проевропски фронт за деблокирање на евроинтеграциите.
Премиерот Христијан Мицкоски изјави дека „нема поместување ниту милиметар“ кога станува збор за уставните измени без обезбедени гаранции, отфрлајќи ги критиките од опозицијата дека неговата позиција го кочи европскиот пат на земјата.
Тој повтори дека уставни измени не се можни без поддршка од ВМРО-ДПМНЕ и нагласи дека нема намера да ги продолжи, како што рече, „меките политики“ на претходната влада предводена од СДСМ.
Лидерот на СДСМ, Венко Филипче, најави засилена политичка активност и обединување на проевропскиот блок, обвинувајќи го Мицкоски дека ја доведува во прашање иднината на земјата.
„Европската иднина на државата станува сè понеизвесна“, изјави Филипче, додавајќи дека опозицијата нема да дозволи блокирање на евроинтегративниот процес.
Изјавите на Мицкоски дека земјата е подготвена да чека и со децении пред вратите на Европската унија доколку не ги добие посакуваните гаранции предизвикаа реакции во јавноста.
Претседателот на Собранието Африм Гаши изјави дека во моментов нема политичко расположение за отворање на Уставот, посочувајќи дека за тоа е потребно двотретинско мнозинство кое засега не е обезбедено.