ДУИ и ВЛЕН во неделата разменија обвинувања за застојот во евроинтеграциите, отворајќи нов фронт во политичката пресметка меѓу двете албански партии во власта и опозицијата.
Потпретседателот на ДУИ и поранешен министер за надворешни работи, Бујар Османи, го обвини ВЛЕН дека не го исполнил ветувањето за забрзување на европскиот пат на Северна Македонија.
Тој рече дека по две години владеење државата не направила суштински чекор кон Европската Унија, а можностите од Планот за раст на ЕУ останале недоволно искористени.
„Наместо забрзување, имаме стагнација. Наместо реформи, имаме импровизации. Наместо европска агенда, имаме дневна политика“, рече Османи.
Тој оцени дека, со ВЛЕН во Владата, „европскиот глас на Албанците е сведен на ништо“.
Од ВЛЕН возвратија дека Османи нема кредибилитет да зборува за евроинтеграции, бидејќи бил дел од долгогодишното владеење на ДУИ со ВМРО-ДПМНЕ, период во кој, според нив, земјата стагнирала на патот кон НАТО и ЕУ.
Пратеничката Саранда Имери-Стафаи рече дека Османи прво треба да даде отчет за годините поминати на високи државни функции.
„Пред да држат лекции за евроинтеграциите, треба да дадат одговор за годините кога беа на власт“, рече Имери-Стафаи.
Од ВЛЕН дополнително порачаа дека Османи ќе биде запаметен како функционер кој, според нив, долго време користел високи позиции без реална политичка одговорност пред граѓаните.
Полемиката доаѓа во период кога евроинтеграциите на Северна Македонија остануваат блокирани поради неизгласаните уставни измени, услов поврзан со преговарачката рамка со ЕУ и спорот со Бугарија.
ВМРО-ДПМНЕ тврди дека уставните измени не се единствената бугарска претензија и дека по нивното евентуално усвојување би можеле да следуваат нови барања.