Најмалку 36 цивили загинаа, а повеќе од 160 се повредени во воздушни напади извршени од пакистанските сили врз цели во Авганистан, соопштија авганистанските власти во понеделникот, додека тензиите меѓу двете соседни земји повторно ескалираат.
Пакистанските безбедносни сили во текот на ноќта спроведоа копнена операција долж границата со Авганистан, проследена со воздушни напади врз, како што ги опишаа, засолништа и бази на милитанти, при што биле убиени 29 борци. Операцијата, според пакистанскиот министер за информации Атаула Тарар, била одговор на серијата напади врз безбедносните сили во Пакистан.
Авганистанските власти остро ги осудија нападите, нарекувајќи ги „кукавички чин на агресија“ и „акт на бруталност“.
Заменик-портпаролот на талибанската влада, Хамдула Фитрат, изјави дека пакистанските сили прво погодиле куќа во областа Чамкани, во провинцијата Пактија, при што загинале постар маж и дете, а повеќе членови на семејството биле повредени. Според него, кога локалните жители се собрале да помогнат во спасувањето, областа повторно била бомбардирана, при што загинале уште 28 лица, а 158 биле ранети.
Во одделен напад во областа Гијан, во провинцијата Пактика, биле убиени шест цивили, главно жени и деца, додека напад врз цивилен објект во провинцијата Кунар не предизвикал човечки жртви, но усмртил околу 30 грла добиток.
Ескалацијата следува по напад врз регионалниот штаб на пакистанските паравоени сили „Ренџерс“ во Карачи, во кој загинаа тројца војници. Пакистанските безбедносни сили соопштија дека убиле тројца напаѓачи и уапсиле уште еден осомничен, идентификуван како авганистански државјанин.
Одговорноста за нападот во Карачи ја презеде Џамаат-ул-Ахрар, фракција поврзана со пакистанските талибанци.
Последните прекугранични напади доаѓаат помалку од три недели по претходните пакистански воздушни операции во Авганистан и ја прекинуваат едномесечната релативна смиреност по периодот што Исламабад го опиша како „отворена војна“ меѓу двете земји.
Откако во февруари започна новиот циклус на судири, во прекуграничното насилство загинаа стотици луѓе. Повеќекратните обиди за посредување, вклучително и разговорите организирани од Кина, досега не успеаја да обезбедат траен прекин на огнот.