Поразот на Виктор Орбан на изборите во Унгарија покажува дека десничарскиот популизам нема долгорочна перспектива, изјави лидерот на британските конзервативци Кеми Баденок во интервју за Политико.
Таа оцени дека убедливата победа на Петер Маѓар над Орбан, кој важеше за близок сојузник на американскиот претседател Доналд Трамп и рускиот претседател Владимир Путин, е „многу позитивен развој“.
„Доволно е да ја погледнете Унгарија и што му се случи на Орбан и Фидес. Ако не можете да испорачате економски раст, без разлика на идеологијата – ќе изгубите“, рече Баденок.
Британската Конзервативна партија, која претрпе тежок пораз на изборите во 2024 година по 14 години на власт, се соочува со пад на поддршката и раст на десничарската популистичка партија Reform UK, предводена од Најџел Фараж.
Сепак, Баденок смета дека подемот на Маѓар покажува дека традиционалната десноцентристичка политика повторно се враќа.
„Конзервативизмот е предизвикан од десно, од економските националисти и популистите, но не мислам дека тоа ќе трае долго“, рече таа.
Баденок ја критикуваше и Европа, велејќи дека „самозадоволството“ станало најголем проблем на континентот.
Таа ја посочи поранешната германска канцеларка Ангела Меркел како пример, оценувајќи дека миграциската политика придонела за раст на скептицизмот кон Европската унија и била еден од факторите за Брегзит.
Изјавите доаѓаат во време кога политичката сцена во Европа се менува, по изборниот пораз на Орбан по 16 години на власт, што според аналитичарите може да има пошироки импликации за десничарските движења на континентот.